Mes: mayo 2018

O vindeiro venres 1 de Xuño, comezará a xornada única de mañán, polo tanto a hora de entrada será ás 9:00 e a de saída ás 13:50 ( os que solicitaron servizo de comedor sairán na hora acordada). Os usuarios de transporte escolar deberán estar nas paradas 30 min antes do habitual.

Coma todos os anos, reunímonos para homenaxear a nosa lingua, a nosa cultura, nun día tan significativo como o Día das Letras Galegas. Este ano celebrámolo dunha forma especial, comezando días antes do 17 de maio a enfatizar o valor da nosa lingua e buscar información sobre a autora homenaxeada ese día. Para iso, os nenos e nenas de 5º de Primaria, baixo o lema “O idioma é a forza que nos sostén; se perdemos a fala non seremos ninguén”, recolleron unha boa mostra de refráns do noso pobo galego. Namentres, os discentes de toda Primaria dedicáronse ó labor periodístico, en busca de información sobre a vida, historia e obra de Mª Victoria Moreno. Ese proceso foi levado a cabo mediante actividades, como o uso do folio xiratorio en 1º, 2º e 3º de Primaria e a exposición entre os compañeiros das obras da autora.  Resaltáronse dous libros: A festa no faiado e Mar Adiante, obras que se plasmaron co proxecto plástico das portadas dende a materia de Educación Plástica.

O 16 de maio, un día antes do Día das Letras Galegas, celebrouse no colexio a homenaxe á autora. Primeiramente, os máis pequenos de Primaria  realizaron unha visita á gardería “Barbanziños” onde leron o conto “A festa no faiado”, colorearon un marcapáxinas de María Victoria Moreno, xogaron un anaquiño cos nenos da escola infantil e remataron a visita entregándolles un agasallo que prepararon con moito agarimo. Foi unha visita moi especial, cargada de emocións!

Xa pola tarde tivo lugar o Festival, onde a espontaneidade e orixinalidade do evento caeu en mans do alumnado de Primaria, xa que sintetizaron todo o traballado sobre a autora mediante unha dramatización escolar e unha mesa redonda onde, tanto participantes como espectadores, participaron animadamente. O broche de ouro correu a cargo do serán levado a cabo pola música das pandeiretas nas mans das nosas alumnas, xunto coa entrega de premios aos discentes de 4º, 5º e 6º de Primaria e 1º e 2º de ESO que participaron na escritura de microrrelatos na honra da autora comezando todos coas verbas dunha das súas obras: “Subiu ata o faiado da casa e alí…”

Un resumo de todas estas actividades pódese ver no seguinte vídeo:

Dende o CPR A Milagrosa pretendemos traballar as habilidades sociais e favorecer o desenvolvemento do noso alumnado no mundo real. Para iso, este ano organizouse, para os cursos de 1º e 2º da ESO, unha viaxe de tres días e dúas noites a Cantabria. Esta viaxe supuxo unha experiencia enriquecedora para os discentes, ademais das aprendizaxes culturais e sociais, onde puideron ver, sentir e tocar moitas das cousas estudadas ao longo do curso nas diferentes materias.

Aberta a convocatoria de axudas, fondo e material escolar para o vindeiro curso 2018-19. Poden consultar a información na lapela AXUDAS LIBROS.

«O corazón, como as cousas que se saben, como os cartos que se gañan, soamente serven para algo se se comparten cos demais»

Mª Victoria Moreno

E 4º de ESO non quixo deixar de celebrar o Día das Letras cunha visita a Ribeira para compartir o noso labor cos maiores da Residencia de anciáns.

Ao longo dunha hora charlamos con eles, algúns deles contáronnos de onde son e como foi a súa vida, ata coñecían a algunhas das nosas familias porque foron veciños! Lémoslles textos da autora homenaxeada, e agasallámolos cunhas letras marcapáxinas. Foi moi emocionante compartir una anaco do noso tempo con eles, que teñen tantas cousas que nos ensinar.

E como remate, nesta semana tamén elaboramos o audiovisual que vos deixamos a seguir.

Esta semana tivemos traballo a fartar. En grupos puxémonos a investigar sobre a orixe desta celebración festiva do 17 de maio e mais sobre a vida e obra da autora homenaxeada: Mª Victoria Moreno. Cando nos quixemos dar conta xa tiñamos o día enriba, así que decidimos compartir o que sabiamos cos máis pequenos do colexio, co alumnado de Infantil. Preparamos un vídeo e agasallámolos cuns globos brancos e azuis, lembrando así as cores da nosa bandeira. Estas son algúns dos momentos desta mañá e tamén vos deixamos o vídeo.

          Agardamos que vos preste!

Os demais grupos de 3º de ESO visitamos as clases de Primaria, falamos con eles, vimos algún vídeo e xogamos a ver quen sabe máis das letras… Foi moi enriquecedor para todos.

Celebramos a apertura do mes de maio, coincidindo co día de Santa Luisa de Marillac, cofundadora das Fillas da Caridade xunto con Vicente de Paúl. Acudimos á capela o alumnado de Infantil, Primaria e Secundaria para así renderlle homenaxe, recordando o seu gran labor no servizo ós máis necesitados.

Comezamos o mes de maio cun pequeno agasallo ás nosas nais no seu día.

Os nen@s de 1º e 2º de Primaria elaborámolos con todo o agarimo que elas se merecen.

Moitas felicidades no teu día MAMÁ !!!

Os alumn@s de 5º e 6º de Primaria asisten a unha representación no Auditorio de Ribeira sobre a vida e obra de María Victoria Moreno, a quen se homenaxea este ano o Día das Letras Galegas.